METODOLOGIA
Er inventari se desvolope en tres etapes ath long deth periòde 2008-2010, e que podem esquematizar d’aguesta manèra:
Cèrca
I a dues manères de cercar es bòsqui potenciaument singulars, ei a díder, es bòsqui candidats a bòsc singular:
- Era prumèra ei a trauès deth reconeishement d’estructures forestaus singulares per fòtointerpretacion de fotografies aerianes, analisi de bases de donades forestaus e bibliografia.
- Era dusau via, e era mès importanta, ei a partir deth coneishement d‘expèrts locaus que son qui melhor coneishen es bòsqui de cada cornèr deth nòste país, persones que trabalhen o que passen part deth sòn temps en aguesti espacis: agents ruraus, tecnics dera administracion, redactors de plans tecnics, naturalistes, grops conservacionistes, proprietaris, excursionistes, estudiosi dera natura, eca.
Reconeishement
Toti es bòsqui proposadi (bòsqui candidats) son sometudi a ua valoracion a dues escales de trabalh:
- En ua prumèra fasa se hè ua valoracion a escala de païsatge per fòtointerpretacion damb esturments de sistèmes d’informacion geografica comparant imatges actuaus damb fotografia aeriana des ans 50. S’en aqueth moment eth bòsc ja auie ua estructura singulara alavetz se delimite eth tròç de bòsc, s’analize era estructura arboricola e er entorn.
- Posteriorament, se realize era valoracion sus eth terren. A compdar dera realizacion de parcèlles d’inventari forestau se mesuren es singularitats deth bòsc mejançant es indicadors de singularitat a trauès dera preséncia, abondància e caracteristiques des arbes singulars, e d’autes caracteristiques relacionades damb er interès deth bòsc, com ara eth tipe e abondància de husta mòrta en descomposicion, era estructura orizontau e verticau dera vegetacion, era riquesa d’espècies lenhoses, eth grad d’afectacion per activitats umanes, eca.
Catalogatge
Damb era informacion recuelhuda enes fases anteriores e en foncion des indicadors consideradi se valòre e catalògue eth grad de singularitat des bòsqui. Eth resultat serà un catalòg de bòsqui singulars per espècies a escala de país e de comarca.